એ સંધિને સમાસ, તને સાંભરે કે નહિ? બે નામ, એક પ્રાસ, તને સાંભરે કે નહિ? – શીતલ ગઢવી

એ સંધિને સમાસ, તને સાંભરે કે નહિ?

બે નામ, એક પ્રાસ, તને સાંભરે કે નહિ?

.

સીધા ચડાણ બાદ કબૂલાત પ્રેમની,

બચપણનો એ પ્રવાસ, તને સાંભરે કે નહિ?

.

ને સ્ત્રોત લાગણીનો થઈ કો’ ઝરણ સર્યું,

છલકી ગયા બે શ્વાસ, તને સાંભરે કે નહિ?

.

સ્પર્શે ફરી વળ્યાં’તા ન્યૂટનના બધાં નિયમ,

વિજ્ઞાનનો એ તાસ, તને સાંભરે કે નહિ?

.

શાળા છૂટ્યા પછીય ન સીધાં ઘરે જવું,

થઈ’તી ઉલટ તપાસ, તને સાંભરે કે નહિ?

– શીતલ ગઢવી