રોટલાની સુગંધ – રાજુલ ભાનુશાલી

આજે આઠવાળી ગાડીનું રિઝરવેશન હતું,

મા ભાતું બનાવી રહી હતી.

એ ચુપચાપ રાંધણીયામાં જઈને ઉભો રહ્યો..

“અબઘડી થઈ જાશે હો ભઈલા” બોખું મોં બોલ્યું.

અને 

કરચલીવાળા  હાથ ઝટપટ ચાલવા લાગ્યા..

એ

હસીને બહાર નીકળ્યો,

ને 

ઝડપભેર 

હાથમાં પકડી રાખેલી 

કાચની શીશીનું બુચ બંધ કરી દીધું..

ઝડબેસલાક!

રખેને 

એક પળનોય વિલંબ થાય

અને

શીશીમાં પેસી ગયેલી,

માના હાથે શેકાતા રોટલાની સુગંધ

પાછી વળી જાય..!

• રાજુલ ભાનુશાલી