શિલ્પથી નમણી તું પંડે પાતળી છે, હોઠ પર લીધી તો લાગ્યું વાંસળી છે. – સ્નેહી પરમાર

શિલ્પથી નમણી તું પંડે પાતળી છે,

હોઠ પર લીધી તો લાગ્યું વાંસળી છે.

.

આંખ,પાંપણ બહાર ક્યાય પગ ન મુકે,

કેટલી તારા વગર એ પાંગળી છે!

.

એક નજરે આખું ઘર જોતું રહે છે, 

તું ગરીબ ઘરમાં બચેલી તાંસળી છે.

.

જોઇને સહસા તને ઝૂક્યું છે મસ્તક,

તું તિલક કરવા ઉઠેલી આંગળી છે.

.

પીઠ ફેરવતી પીડા ઉભી રહી ગઈ,

માર્ગમાં તું જ્યાં મને સામે મળી છે.

.

હાથ જોડી મેં બધી નદીઓ વળાવી,

સ્નેહી ! મારી પ્યાસ તો ગંગાજળી છે.

• સ્નેહી પરમાર