એથી થોડું રડીને આવ્યા, હમણાં એને મળીને આવ્યા ! – નિનાદ અધ્યારુ
એથી થોડું રડીને આવ્યા,
હમણાં એને મળીને આવ્યા !
.
દર્પણ-ઘરમાં ગયેલાં લોકો-
બાહર કેવું ડરીને આવ્યાં !
.
કોને માટે ઘસ્યું આ કાજળ ?
કોને હૈયે વસીને આવ્યાં ?
.
એ ન્હોતાં તો બીજું શું કરીએ ?
એનાં ઘરને અડીને આવ્યા !
.
પાટાપિંડી કરો શું એની ?
જે માલીપા પડીને આવ્યાં !
.
ઉપર ગ્યા, તો પ્રભુએ પૂછ્યું:
કાં ભૈ ખાડો કરીને આવ્યા ?
.
બચપણમાં બે-ઘડી શું ગ્યા’તા,
ખિસ્સે વડલો ભરીને આવ્યા !
.
ઉકલે નહિ ખુદ તમારા અક્ષર ?
આ તે કેવું ભણીને આવ્યા ?
.
તારક તોડી શક્યા ના ‘નિનાદ’,
હાથે અબરખ ઘસીને આવ્યા !
– નિનાદ અધ્યારુ
