કોઇ પણ ધોરણ અને ધારા વગર, ભક્તને ઈશ્વર મળે માળા વગર! – નિનાદ અધ્યારુ
કોઇ પણ ધોરણ અને ધારા વગર,
ભક્તને ઈશ્વર મળે માળા વગર!
.
ચાલશે પીધા વગર, ખાધા વગર,
પણ તું જીવી નહિ શકે ભાષા વગર.
.
એ વિચારે દીકરી તૈયાર થઇ,
બાપ કેવો લાગશે સાફા વગર!
.
એવું તો હાલરડે હિલ્લોળે ચડ્યું,
છોકરું પોઢી ગયું હાલા વગર!
.
પાણી જો ઓછું હશે તો ચાલશે,
પણ નદી શોભે નહિ પાણા વગર.
.
આજ રીક્ષા સાવ ભૂખી સૂઈ જશે,
ઝોળી ખાલી રહી ગઈ ભાડા વગર.
.
છે પરસ્પર બેઉની કિંમત ‘નિનાદ’,
ચાવીનું શું મૂલ્ય છે તાળા વગર?
– નિનાદ અધ્યારુ
